अमळनेर, ता. ०३ जुलै २०२५ :
रोटरी क्लब अमळनेरच्या नवीन कार्यकारिणीचा शपथविधी समारंभ दिनांक १ जुलै रोजी रोटरी हॉल येथे उत्साहात पार पडला. या समारंभात रो. देवेंद्र कोठारी यांनी अध्यक्षपदाची तर रो. आशिष चौधरी यांनी सचिवपदाची शपथ घेतली.
कार्यक्रमाच्या प्रारंभी मावळते अध्यक्ष रो. ताहा बुकवाला आणि मावळते सचिव रो. विशाल शर्मा यांनी आपल्या कार्यकाळात रोटरी क्लबने राबवलेल्या विविध प्रकल्पांची माहिती सादर केली. त्यांनी मागील वर्षीच्या उपक्रमांचा आढावा देत संघटनेच्या यशस्वी वाटचालीचे दर्शन घडवले.
नूतन कार्यकारिणीच्या निवडी दरम्यान सर्व सदस्यांच्या एकमताने रो. देवेंद्र कोठारी यांची अध्यक्षपदी व रो. आशिष चौधरी यांची सचिवपदी निवड करण्यात आली. यावेळी बोलताना रो. आशिष चौधरी म्हणाले, “संस्थेने मला सचिवपदाची संधी दिल्याबद्दल मी सर्व रोटरी सदस्यांचे आभार मानतो. आगामी वर्षात सर्वांना सोबत घेऊन सामाजिक उपक्रमात नवे मापदंड गाठण्याचा प्रयत्न करणार आहे.”
रोटरी क्लब अमळनेर ही पक्ष-राजकारणापासून दूर राहून समाजासाठी कार्य करणारी एक जागतिक पातळीवरील स्वयंसेवी संस्था आहे. तिचे ध्येय सेवाभावी कार्यातून सामाजिक एकोपा, शांतता, नैतिक मूल्यांचा प्रसार, शिक्षण व आरोग्य क्षेत्रात योगदान देणे हे आहे. यावर्षीही क्लबने अनेक महत्वाकांक्षी उपक्रम राबवण्याचा संकल्प केला आहे.
नवीन अध्यक्ष रो. देवेंद्र कोठारी यांनी आपल्या भाषणात येत्या कार्यकाळात राबविण्यात येणाऱ्या उपक्रमांची माहिती दिली. यात रोजगार मेळावे, शेतकरी मेळावे, वृक्षारोपण, वैद्यकीय तपासणी शिबिरे, एड्स प्रोटीन किट वितरण, शालेय विद्यार्थ्यांसाठी सुविधा, कौशल्य विकास उपक्रम, बाल आणि मातेसाठी संगोपन सहाय्य प्रकल्प अशा विविध सामाजिक योजना राबविण्यात येणार असल्याचे त्यांनी सांगितले.
या प्रसंगी रो. विनोद भैय्या पाटील यांनी नवनियुक्त पदाधिकाऱ्यांचे अभिनंदन करताना म्हटले की, “क्लबच्या संचालक मंडळावर तुमची निवड झाल्यामुळे आम्हाला आनंद होत आहे. आम्हाला खात्री आहे की तुमचे योगदान क्लबच्या यशात मोलाची भूमिका बजावेल.”
कार्यक्रमाच्या शेवटी सचिव रो. आशिष चौधरी यांनी सर्व उपस्थितांचे, रोटरी क्लबच्या सदस्यांचे आणि कार्यकर्त्यांचे आभार मानले.
कार्यक्रम यशस्वी करण्यासाठी क्लबच्या सदस्यांनी परिश्रम घेतले. रोटरी क्लब अमळनेरचे हे नवीन नेतृत्व समाजहितासाठी विविध क्षेत्रांत कार्य करेल, असा विश्वास यावेळी व्यक्त करण्यात आला.
|| अमंत्रमक्षरं नास्ति नास्ति मूलमनौषधम् । अयोग्यः पुरुषो नास्ति योजकस्तत्र दुर्लभः ॥
(कोणतेही औषध निष्क्रिय नाही, कोणतीही औषधी वनस्पती व्यर्थ नाही, आणि कोणताही मनुष्य अयोग्य नाही – फक्त योग्य प्रकारे त्यांचा उपयोग करणारा दुर्मिळ आहे.)
