अमळनेर, दि. १५ ऑगस्ट ( अटकाव न्यूज ) –
अमळनेर शहरातील सायरदेवी बोहरा सेंट्रल स्कूलमध्ये स्वातंत्र्य दिनानिमित्त भव्य व उत्साहपूर्ण ध्वजारोहण सोहळ्याचे आयोजन करण्यात आले. देशभक्तीच्या भावना जागृत करणाऱ्या या कार्यक्रमाला मान्यवर, पालक, शिक्षक व विद्यार्थी मोठ्या संख्येने उपस्थित होते.
कार्यक्रमाचे प्रमुख पाहुणे म्हणून जिल्हा परिषद समिती सदस्य सौ. जयश्रीताई पाटील, श्री. गौरव बोहरा, डॉ. नम्रता बोहरा, मिलिटरी रिटायर्ड नायक श्री. योगेश कापडणे, तसेच शाळेचे मुख्याध्यापक श्री. जितेंद्रसिंह यांची उपस्थिती होती.
सोहळ्याची सुरुवात जयश्रीताई पाटील यांच्या हस्ते भारतमातेच्या प्रतिमेच्या पूजनाने झाली. त्यानंतर ध्वजारोहण करण्यात आले व विद्यार्थ्यांनी सामूहिकपणे झेंडागीत सादर करून वातावरण भारावून टाकले. शाळेतील विद्यार्थी व शिक्षकांनी देशभक्तीपर भाषणे करून उपस्थितांना प्रेरित केले.
यानंतर प्रमुख पाहुण्यांच्या हस्ते विविध स्पर्धांतील विजेत्या विद्यार्थ्यांना बक्षीस वितरण करण्यात आले. आपल्या भाषणात जयश्रीताई पाटील यांनी विद्यार्थ्यांचे कौतुक करत देशसेवेचे महत्त्व अधोरेखित केले.
हा कार्यक्रम शाळेचे मुख्याध्यापक श्री. जितेंद्रसिंह यांच्या मार्गदर्शनाखाली सर्व शिक्षकवृंद, विद्यार्थी व शिक्षकेतर कर्मचारी यांच्या सहकार्याने यशस्वीरीत्या पार पडला. कार्यक्रमादरम्यान देशभक्तीचा माहोल आणि उत्साहाचे वातावरण अनुभवायला मिळाले.
