अमळनेर, दि. १४ ऑगस्ट –( अटकाव न्यूज )
अमळनेर येथील सायरदेवी बोहरा सेंट्रल स्कूल मध्ये स्वतंत्र दिनाच्या पूर्वपर्वावर एक भव्य सोशल सर्व्हिस कॅम्प व शैक्षणिक प्रकल्प प्रदर्शनाचे आयोजन करण्यात आले. या उपक्रमामध्ये विद्यार्थ्यांनी विज्ञान, भूगोल आणि सांस्कृतिक वारसा यावरील सृजनशील प्रकल्प सादर करत ज्ञान आणि सामाजिक जबाबदारीचा संगम घडवून आणला.
कार्यक्रमाचे उद्घाटन मान्यवरांच्या हस्ते सरस्वती पूजन व रिबीन कटिंग करून करण्यात आले. यावेळी परीक्षक म्हणून डी.आर. कन्या शाळेच्या सौ. प्रज्ञा जोशी, कंचन शहा, वसुंधरा लांडगे, आर्मी स्कूलचे श्री. शरद पाटील तसेच प्रताप कॉलेजचे जोशी सर उपस्थित होते. शाळेचे डायरेक्टर श्री. गौरव बोहरा आणि मुख्याध्यापक श्री. जितेंद्र सिंह यांच्या प्रमुख उपस्थितीत कार्यक्रमाला सुरुवात झाली.
प्रकल्प प्रदर्शनात इयत्ता पहिलीपासून दहावीपर्यंतच्या विद्यार्थ्यांनी “आकाशगंगेतील नवग्रह”, “महाराष्ट्रातील किल्ले”, “सप्तऋषी” या विषयांवर कलात्मक व शैक्षणिक प्रकल्प साकारले. विद्यार्थ्यांच्या सृजनशीलतेमुळे प्रदर्शने एवढी प्रभावी ठरली की परीक्षकांनाही विजेते ठरवताना संभ्रम निर्माण झाला.
या यशस्वी उपक्रमामध्ये शाळेचे सर्व शिक्षक, शिक्षकेतर कर्मचारी आणि विद्यार्थ्यांचा सक्रिय सहभाग लाभला. कार्यक्रमाचे नियोजन व मार्गदर्शन शाळेचे डायरेक्टर श्री. गौरव बोहरा यांनी केले. मुख्याध्यापक श्री. जितेंद्र सिंह यांनी विद्यार्थ्यांच्या मेहनतीचे कौतुक करत त्यांना आगामी वाटचालीसाठी शुभेच्छा दिल्या.
या निमित्ताने सायरदेवी बोहरा सेंट्रल स्कूलने पुन्हा एकदा सामाजिक जबाबदारी, शैक्षणिक प्रगल्भता आणि सांस्कृतिक जाणीव यांचे उत्कृष्ट मिश्रण सादर केले.
