अमळनेर, ✍️ अटकाव न्यूज✍️
युवा कल्याण प्रतिष्ठान, अमळनेर यांच्या वतीने आणि प्रा. अशोक पवार सर यांच्या सहकार्याने राष्ट्रीय विचार प्रबोधन अभियान अंतर्गत नूतन माध्यमिक विद्यालय, अंतुर्ली व माता बिजासनी आश्रम शाळा, अंतुर्ली येथे विशेष कार्यक्रमाचे आयोजन करण्यात आले.
नूतन माध्यमिक विद्यालय येथे कार्यक्रमाच्या अध्यक्षस्थानी श्री. आर. बी. पाटील होते.
प्रमुख पाहुणे व मार्गदर्शक म्हणून आ. गोकुळ (आबा) पाटील, मा. केंद्रप्रमुख यांनी विचार मांडले.
कार्यक्रमाचे प्रभावी सूत्रसंचालन सुभाष पाटील यांनी केले तर आभार प्रदर्शन गुलाबराव पाटील यांनी केले.
माता बिजासनी आश्रम शाळा येथील कार्यक्रमाचे अध्यक्षस्थान श्री. मुके सर यांनी भूषवले.
सौजन्यपूर्ण सूत्रसंचालन पावरा सर यांनी केले आणि मनोगत व आभारप्रदर्शन श्री. मनोहर पाटील यांनी केले.
या कार्यक्रमाचे मुख्य आकर्षण म्हणजे लोकशाहीर अण्णा भाऊ साठे यांच्या प्रेरणादायी जीवनकार्याची माहिती आणि लोकमान्य टिळक यांची राष्ट्रनिष्ठ विचारधारा यांचा समन्वय.
प्रमुख पाहुणे आबा गोकुळ पाटील यांनी आपल्या भाषणात सांगितले की,
“जयंती आणि पुण्यतिथी नाचून नव्हे तर वाचून आणि समजून साजरी करावी. लोकमान्य टिळक आणि अण्णा भाऊ साठे यांचे विचार जर आपण आत्मसात केले, तर त्यांच्या कार्याचा खरा गौरव होईल.”
अण्णा भाऊ साठे यांचे जीवनकार्य अत्यंत संघर्षमय होते. वाटेगाव (जि. सांगली) येथून मुंबईपर्यंत पायी प्रवास करत त्यांनी मजुरी केली, समाजाशी नाळ जुळवली. गिरणी कामगार म्हणून काम करताना कामगार, दलित, शोषित यांच्या अन्यायाला वाचा फोडण्यासाठी त्यांनी लेखणीचा वापर केला.
स्वतः अक्षरशत्रू असूनही त्यांनी प्रौढ शिक्षणातून साक्षरतेचा मार्ग शोधला. त्यांनी लिहिलेल्या ३५ कादंबऱ्या, १५ लघुकथा संग्रह, १२ पटकथा, ७ लोकनाट्य, विविध पोवाडे, गवळणी यामुळे मराठी साहित्याला समृद्धी प्राप्त झाली. ‘वारणेचा वाघ’, ‘माझी मैना गावाकडे राहिली’ यांसारख्या साहित्यकृती आजही तितक्याच प्रभावी वाटतात.
त्यांनी लिहिलेला छत्रपती शिवाजी महाराजांवरील पोवाडा रशियन भाषेत अनुवादित होऊन मास्कोमध्ये गाजला, ही मराठी साहित्यासाठी अभिमानास्पद गोष्ट आहे.
कार्यक्रमाच्या यशस्वीतेसाठी सुभाष पाटील, गुलाबराव पाटील, मंगलाताई पाटील, शैलाताई बैसाणे, साळुंखे मॅडम, प्रवीण पाटील, मनोहर पाटील, साळुंखे सर, पावरा सर, संदीप उघडे सर, भगवान पाटील, नानाभाऊ यांचे विशेष सहकार्य लाभले.
कार्यक्रमात विद्यार्थ्यांनी, शिक्षकांनी व ग्रामस्थांनी मोठ्या संख्येने उपस्थित राहून विचारप्रबोधनाचे महत्त्व अधोरेखित केले.
