अमळनेर|अटकाव न्यूज:
भारतीय संसदेतील उत्कृष्ट कार्यगौरवासाठी दिला जाणारा ‘संसद रत्न पुरस्कार 2025’ यंदा जाहीर झाला असून, महाराष्ट्रातील सात खासदारांचा यामध्ये समावेश आहे. विशेष म्हणजे, उत्तर महाराष्ट्रातून एकमेव निवड जळगाव लोकसभा मतदारसंघाच्या खासदार मा.श्रीमती स्मिताताई वाघ यांची झाली असून, हा जिल्ह्यासह संपूर्ण विभागासाठी गौरवाचा व अभिमानाचा क्षण आहे.
लोकशाहीतील दर्जेदार कार्यगौरव
संसद रत्न पुरस्कार हा भारतीय लोकशाहीतील सर्वोत्कृष्ट संसदीय कार्यगौरव मानला जातो. या पुरस्कारासाठी लोकसभेतील प्रश्न विचारणे, चर्चांमध्ये सक्रिय सहभाग, खासगी विधेयक मांडणे, तसेच विविध जनहिताच्या मुद्द्यांवर सातत्याने आवाज उठवणे यांसारख्या अनेक निकषांचा विचार केला जातो. या सर्व कसोट्यांवर यशस्वी ठरलेल्या खासदार स्मिताताई वाघ यांनी 17व्या लोकसभेपासून संसदेतील प्रत्येक अधिवेशनात आपली ठसठशीत उपस्थिती नोंदवली आहे.
संसद रत्न पुरस्काराची परंपरा
या पुरस्काराची संकल्पना ‘गांधी विचार मंच’ व माजी मुख्य निवडणूक आयुक्त टी.एस. कृष्णमूर्ती यांच्या पुढाकारातून 2010 साली साकारली गेली. ‘प्राइम पॉइंट फाउंडेशन’ या संस्थेच्या वतीने हा पुरस्कार प्रदान केला जातो. भारताचे माजी राष्ट्रपती डॉ. ए.पी.जे. अब्दुल कलाम यांच्या हस्ते पहिल्यांदा हा पुरस्कार दिला गेला होता. त्यांच्या प्रेरणेतून या पुरस्काराला राष्ट्रीय पातळीवर विशेष महत्त्व प्राप्त झाले.
स्मिताताई वाघ यांचे संसदीय योगदान
स्मिताताई वाघ यांनी संसदेत रेल्वे अंडरपास, नागरिकांना होणारा वाहतूक त्रास, वायफळ खर्च आदी मुद्दे प्रभावीपणे मांडून सरकारच्या निदर्शनास आणून दिले. तसेच शेतकरी, महिला सक्षमीकरण, शिक्षण, आरोग्य, जलसंधारण, बेरोजगारी, राष्ट्रीय शिक्षण धोरण अशा अनेक महत्त्वाच्या विषयांवर अभ्यासपूर्ण आणि स्पष्ट भूमिका मांडत संसदेतील आपली उपस्थिती ठामपणे दर्शवली आहे.
जिल्हावासियांचा अभिमान
या प्रतिष्ठित पुरस्कारामुळे जळगाव जिल्ह्यात सर्वत्र आनंदाचे व उत्साहाचे वातावरण आहे. नागरिक, सामाजिक संस्था, युवक वर्ग, विविध राजकीय पक्षांचे पदाधिकारी आणि समाजातील अनेक स्तरातून स्मिताताई वाघ यांच्यावर अभिनंदनाचा वर्षाव होत आहे. संपूर्ण लोकसभेत त्यांच्या कार्यक्षमतेचे कौतुक होत असून, हा सन्मान केवळ त्यांच्या वैयक्तिक कार्याचा गौरव नसून, जळगाव जिल्ह्यातील प्रत्येक नागरिकाच्या विश्वासाला मिळालेली पावती आहे.
संसद रत्न पुरस्कार 2025 प्राप्त होणे हे केवळ सन्मान नव्हे, तर संसदेत जनतेचा आवाज ठामपणे उठवण्याची जबाबदारी पेलणाऱ्या एका कणखर खासदाराची राष्ट्रपातळीवर दखल घेण्यात आल्याचा पुरावा आहे. स्मिताताई वाघ यांच्या या यशाबद्दल ‘अटकाव न्यूज’ तर्फे मनःपूर्वक शुभेच्छा व पुढील वाटचालीसाठी शुभेच्छा!
