अमळनेर : अमळनेर शहर आणि तालुक्यात दिवसेंदिवस वाढत चाललेल्या अवैध धंद्यांविरोधात उद्या बुधवार, १५ ऑगस्ट रोजी महाराष्ट्र राज्य पत्रकार संघाच्या इलेक्ट्रॉनिक मीडिया विभागाचे उत्तर महाराष्ट्र अध्यक्ष डॉ. समाधान मैराळे तहसील कार्यालयाच्या आवारात उपोषणाला बसणार आहेत. सकाळी ९:३० वाजता सुरू होणाऱ्या या उपोषणात शहरातील नागरिक, सामाजिक कार्यकर्ते आणि बुद्धिजीवी वर्गाने उपस्थित राहावे, असे आवाहन त्यांनी केले आहे.
डॉ. मैराळे यांनी काही दिवसांपूर्वीच अमळनेर पोलिस ठाण्याचे निरीक्षक निकम यांना निवेदन देऊन सट्टा, दारू, गुटखा, जुगार आणि गांजाच्या खुलेआम सुरू असलेल्या विक्रीवर तातडीने कारवाई करण्याची मागणी केली होती. मात्र, निवेदन दिल्यानंतरही कारवाई न झाल्याने अखेर ते उपोषणाच्या मार्गावर जाण्याचा निर्णय त्यांनी घेतला आहे.
अमळनेर हे प्रतिपंढरपूर, मंगळ ग्रह मंदिर आणि साने गुरुजींची कर्मभूमी म्हणून ओळखले जाते. तरीदेखील, सध्या शहरात अवैध धंद्यांना उघडपणे चालना मिळाल्याची चर्चा सुरू आहे. स्थानिकांच्या मते, हे सर्व धंदे पोलिसांच्या आशीर्वादाने सुरू आहेत, ज्यामुळे पोलिस विभाग आणि अमळनेर तालुक्याची प्रतिमा कलंकित होत असल्याची भावना व्यक्त होत आहे.
“अवैध धंदे तातडीने बंद करून संबंधितांवर कठोर कारवाई झाली पाहिजे, अन्यथा मी स्वातंत्र्य दिनी उपोषण करणार आहे,” असा इशारा डॉ. मैराळे यांनी निवेदनातून दिला होता. मात्र, संबंधितांकडून कोणतीही ठोस कारवाई न झाल्याने ते आता प्रत्यक्ष कृतीला उतरले आहेत.
या उपोषणामुळे शहरातील कायदा-सुव्यवस्था आणि पोलिस प्रशासनाच्या कामकाजावर प्रश्नचिन्ह निर्माण होण्याची शक्यता आहे. अमळनेरकरांचे लक्ष आता १५ ऑगस्ट रोजी होणाऱ्या या आंदोलनाकडे लागले आहे.
प्रतिक्रिया
दिनांक ४ ऑगस्ट रोजी अवैध धंदे तात्काळ बंद करण्यासाठी संबंधित प्रशासनाला निवेदन देण्यात आले होते. परंतु, आजपर्यंत यावर कोणतीही ठोस कारवाई झालेली नाही. त्यामुळे उद्या तहसील कार्यालयाच्या आवारात मी आमरण उपोषणास सुरुवात करणार आहे.
या उपोषणाला अमळनेर येथील सर्व बुद्धिजीवी, सामाजिक कार्यकर्ते व नागरिकांनी मन:पूर्वक पाठिंबा द्यावा, ही विनंती.
– डॉ. समाधान मैराळे
महाराष्ट्र राज्य पत्रकार संघ (इलेक्ट्रॉनिक मीडिया)
विभागीय अध्यक्ष
