अमळनेर (ता. १० जुलै) – “अनुभव हा आयुष्यातील सर्वोत्तम गुरू आहे. अनेकवेळा जीवनात अडचणी येतात, चुका होतात; पण त्या अनुभवातून शिकून सकारात्मक दृष्टिकोन ठेवणे, हेच यशाचे गमक आहे,” असे प्रेरणादायी विचार मा. उपविभागीय पोलीस अधिकारी श्री. विनायक कोते यांनी व्यक्त केले.
गुरुपौर्णिमेनिमित्त अमळनेर येथे ‘गुरूंचा सन्मान’ या विशेष कार्यक्रमाचे आयोजन करण्यात आले होते. कार्यक्रमाचे आयोजन अमळनेर पोलिस स्टेशनतर्फे करण्यात आले. हे कार्यक्रम मा. पोलीस महानिरीक्षक, नाशिक परिक्षेत्र यांच्या संकल्पनेतून, मा. पोलीस अधीक्षक जळगाव आणि मा. अप्पर पोलीस अधीक्षक चाळीसगाव यांच्या मार्गदर्शनाखाली पार पडले.
या कार्यक्रमाचे अध्यक्षस्थान मा. उपविभागीय पोलीस अधिकारी श्री. विनायक कोते यांनी भूषवले. प्रमुख मार्गदर्शक म्हणून पोलिस निरीक्षक श्री. दत्तात्रय निकम उपस्थित होते. त्यांनी आपल्या मनोगतात शिक्षक हा समाजाचा आधारस्तंभ असल्याचे सांगत, “शिक्षक चांगल्या आणि वाईट गोष्टींचा भान समाजाला देतात. त्यांच्या ऋणातून उतराई होण्यासाठी त्यांचा सन्मान करणे, ही आपली जबाबदारी आहे,” असे नमूद केले.
या कार्यक्रमात तालुक्यातील प्राथमिक व माध्यमिक शाळांतील अनेक शिक्षकांचा सन्मान करण्यात आला. विशेषतः मागील काळात आदर्श शिक्षक पुरस्कार प्राप्त शिक्षक आणि दिव्यांग शिक्षकांचा विशेष गौरव करण्यात आला.
यावेळी प्रमुख पाहुणे म्हणून विस्तार अधिकारी प्रमोद पाटील, मुख्याध्यापक संघाचे तालुकाध्यक्ष तुषार बोरसे, प्रमोदिनी पाटील, प्रा. शिला पाटील, अर्बन बँकेचे व्हा. चेअरमन रणजीत शिंदे, केंद्रप्रमुख शरद सोनवणे, स्वाती पाटील, छगन पाटील आदी मान्यवरांनी आपल्या भावना व्यक्त केल्या.
प्रातिनिधिक स्वरूपात गोकुळ साळुंखे, इंदूबाई महाले, प्रकाश पाटील, दिलीप सोनवणे, महेंद्र पाटील यांचा व्यासपीठावर विशेष सत्कार करण्यात आला. त्यानंतर उपस्थित सर्व शिक्षकांचाही जागेवर सत्कार करण्यात आला.
कार्यक्रमास मारवड पोलीस स्टेशनचे एपीआय जीभाऊ पाटील, एपीआय रवींद्र पिंगळे, एपीआय सुनील लोखंडे, पोलीस उपनिरीक्षक नामदेव बोरकर, फिरोज बागवान, गणेश पाटील, अशोक साळुंखे, चंद्रकांत पाटील, विनोद भोई, मिलिंद सोनार, लक्ष्मीकांत शिंपी, अमोल पाटील, सिद्धांत शिसोदे, प्रशांत पाटील, जितेंद्र निकुंभे, नितीन कापडणे, शेखर साळुंखे आदी पोलीस अधिकारी व कर्मचारी उपस्थित होते.
कार्यक्रमाचे सुंदर सूत्रसंचालन माध्यमिक शिक्षक संघाचे अध्यक्ष संजय पाटील यांनी केले, तर आभार प्रदर्शन पो.सिद्धांत शिसोदे यांनी केले.
हा कार्यक्रम शिक्षक व पोलीस यांच्यातील सुसंवाद आणि परस्पर सन्मानाचे एक उत्तम उदाहरण ठरला.
