अमळनेर : अमळनेर शहरातील आर. के. नगर येथील गणपती मंदिर परिसरात मराठा समाज महिला मंडळाच्या वतीने एक विशेष जनजागृतीपर सभा आयोजित करण्यात आली. समाजात दिवसेंदिवस निर्माण होणाऱ्या गंभीर सामाजिक प्रश्नांवर महिलांचे लक्ष वेधून या माध्यमातून सकारात्मक बदल घडवून आणण्याचा उद्देश या सभेमागे होता.
सद्यस्थितीत तरुण-तरुणींकडून चुकीच्या जोडीदारांची निवड, पालकांना विश्वासात न घेता होणारी लग्ने, तसेच कुटुंबात संवादाचा अभाव या गोष्टींमुळे अनेक समस्यांचा सामना करावा लागत आहे. यासंदर्भात महिलांमध्ये जागृती निर्माण करणे गरजेचे असल्याने मराठा समाज महिला मंडळाने पुढाकार घेतला.
कार्यक्रमाचे प्रास्ताविक प्रा. शिला पाटील (अध्यक्ष, महिला मंडळ) यांनी केले. त्यांनी पालक आणि मुलांमधील संवाद, लैंगिक शिक्षणाचे महत्त्व, सोशल मीडियाची योग्य जाणीव अशा महत्त्वपूर्ण विषयांवर उपस्थित महिलांना मार्गदर्शन केले.
प्रमुख वक्त्या सौ. सुलोचना वाघ यांनी “मुलांचे बंडखोरीकडे वळण्याचे कारण”, “घरातील सकारात्मक वातावरणाचे महत्त्व”, तसेच “मुलींना समजून घेण्यासाठी आईने घेतलेली भूमिका” याविषयी मनोगत व्यक्त केले. त्यांच्या सखोल मार्गदर्शनामुळे उपस्थित महिलांनी आपल्या कुटुंबात आणि समाजात या बाबतीत सकारात्मक बदल घडवण्याचा निर्धार व्यक्त केला.
कार्यक्रमात ज्येष्ठ नेत्या सौ. तिलोत्तमा पाटील यांनी महिलांना उद्देशून, “समाजासमोरील प्रश्नांवर आपण एकत्रितपणे उपाय शोधला पाहिजे, यासाठी महिला मंडळाच्या पदाधिकाऱ्यांशी संपर्क साधावा, आम्ही सर्वतोपरी सहकार्य करू,” असे आश्वासन दिले.
सभेला परिसरातील सर्व जाती-धर्मातील महिलांचा मोठा प्रतिसाद मिळाला. विशेष म्हणजे किशोरवयीन मुलींसह अनेक मातांनी सभेस उपस्थित राहून विषयाचे गांभीर्य अधोरेखित केले.
या प्रसंगी अर्बन बँक संचालिका सौ. वसुंधरा लांडगे, खा. शि. मंडळ उपाध्यक्षा सौ. माधुरी पाटील, सौ. पद्मजा पाटील, सौ. सुनिता पाटील, प्रभा पवार, सौ. रागिणी पाटील, सौ. मनिषा पाटील, कमलबाई पाटील, मंगला पाटील, सौ. प्रतिभा पाटील, सौ. देवरे यांच्यासह अनेक मान्यवर महिला उपस्थित होत्या.
कार्यक्रमाच्या यशस्वीतेसाठी सौ. लीना प्रविण पाटील, शिक्षण विस्तार अधिकारी सौ. शैलजा रणजित शिंदे, मोहिनी नितीन सोनार, जान्हवी बोरसे, जयश्री सोनार, मुग्धा पाटील, लीना शिंपी, मीना पाटील यांनी विशेष परिश्रम घेतले.
ही सभा समाजातील महिलांसाठी प्रेरणादायी ठरली असून, अशा उपक्रमांची सातत्याने गरज असल्याचे मत उपस्थित महिलांनी व्यक्त केले. महिला मंडळाने घेतलेल्या पुढाकाराचे सर्वत्र कौतुक होत आहे.
