अमळनेर (अटकाव न्यूज) – देशाच्या संरक्षणासाठी आपले प्राण पणाला लावणाऱ्या अमळनेरच्या सुपुत्राचे, वीर जवान विजय किरण संदानशिव यांचे अमळनेरात भव्य स्वागत करण्यात आले. जम्मू-काश्मीरमध्ये भारतीय सेनेत कार्यरत असताना, त्यांनी “ऑपरेशन सिंदूर” मध्ये प्रत्यक्ष सहभाग घेत अत्यंत धाडसाने आणि शौर्याने अनेक दहशतवाद्यांचा सामना केला.
अमळनेर येथील ताडेपुरा भिमनगर परिसरातील रहिवासी असलेले विजय किरण संदानशिव हे भारतीय सेनेतील महार बटालियन III रेजिमेंटमध्ये कार्यरत आहेत. सुट्टीवर घरी असताना अचानक सैन्य दलाकडून जम्मू-काश्मीरमध्ये सेवेसाठी बोलावण्यात आले. तेथे परिस्थिती अत्यंत तणावपूर्ण असतानाही, त्यांनी कोणत्याही क्षणाची भीती न बाळगता, अत्युच्च शौर्य दाखवत पाकिस्तानातून पाठवलेल्या दहशतवाद्यांशी झुंज दिली.
१० मे रोजी पाकिस्तानकडून ड्रोनद्वारे हल्ला
ऑपरेशन दरम्यान, १० मे रोजी त्यांच्या रेजिमेंटवर पाकिस्तानकडून ड्रोनद्वारे अचानक हल्ला करण्यात आला. या हल्ल्यात काही जवान जखमी झाले, मात्र विजय संदानशिव हे हल्ल्याच्या ठिकाणापासून केवळ २५ मीटर अंतरावर असतानाही ते थोडक्यात बचावले. त्यानंतर त्यांनी आणि त्यांच्या तुकडीने अतिशय यशस्वीरित्या ऑपरेशन सिंदूर पार पाडले.
अमळनेरमध्ये पंचशील युवक मंडळातर्फे भव्य सत्कार
देशसेवेतील या शौर्यपूर्ण योगदानानंतर विजय संदानशिव जेव्हा सुखरूप गावी परतले, त्यावेळी पंचशील युवक मंडळ, अमळनेर यांच्या वतीने त्यांचा भव्य सत्कार करण्यात आला. या सत्कार सोहळ्याला युवक मंडळाचे अनेक सदस्य, स्थानिक नागरिक आणि विविध क्षेत्रातील मान्यवर मोठ्या संख्येने उपस्थित होते. त्यांच्या या कार्याबद्दल परिसरात अभिमानाची भावना निर्माण झाली असून संपूर्ण शहरात त्यांच्या कार्याची चर्चा होत आहे.
विजय संदानशिव यांचे मोठे बंधू विनोद संदानशिव हे अमळनेर पोलीस स्टेशनच्या डिटेक्शन ब्रँचमध्ये कार्यरत आहेत. संपूर्ण संदानशिव कुटुंबीयांचा देशसेवेतील सहभाग आणि योगदानामुळे परिसरात त्यांचा सन्मान अधिकच वाढला आहे.
