अमळनेर : अल्लामा फ़ज़ले हक़ खैराबादी (रह.) स्टडी सेंटर आणि पब्लिक लाइब्रेरी, अमळनेर येथे नुकताच एक प्रेरणादायी सत्कार समारंभ मोठ्या उत्साहात पार पडला. या कार्यक्रमात ज्येष्ठ विधिज्ञ ॲड. विजय ढिवरे यांचे सुपुत्र ॲड. सागर विजय ढिवरे आणि प्रा. डॉ. विजय भोजू खैरनार यांचे सुपुत्र ॲड. अविनाश खैरनार यांचा एल.एल.एम. ही उच्च विधी परीक्षा यशस्वीरित्या उत्तीर्ण केल्याबद्दल सन्मान करण्यात आला.
या कार्यक्रमाचे सुत्रसंचालन श्री. भरत बोरसे सर यांनी तर अध्यक्षस्थानी नॅशनल हायस्कूलचे चेअरमन हाजी ताहेर शेख साहेब होते. सत्कारमूर्तींना पुष्पगुच्छ देऊन त्यांचे स्वागत करण्यात आले. यावेळी स्टडी सेंटरचे अध्यक्ष मौलाना रियाज़ शेख यांनी आपल्या प्रास्ताविक भाषणात, दोन्ही युवकांनी आपल्या मेहनतीच्या जोरावर पहिल्याच प्रयत्नात एल.एल.एम. सारखी प्रतिष्ठित पदवी मिळवली असून ही बाब प्रेरणादायक असल्याचे गौरवोद्गार काढले.
ते म्हणाले, “आज गरिब, वंचित, शोषित समाजातील युवकांनी उच्च शिक्षणाच्या माध्यमातून अन्याय आणि अत्याचाराविरुद्ध आवाज उठविणे ही काळाची गरज आहे. ॲड. सागर ढिवरे आणि ॲड. अविनाश खैरनार यांनी ही जबाबदारी पुढे नेईल, अशी अपेक्षा आहे. ते डॉ. बाबासाहेब आंबेडकर यांचे खरे स्वप्न पूर्ण करतील.”
यानंतर सत्कारमूर्तींनी मनोगत व्यक्त करताना भारतीय संविधानातील अनुच्छेद 14 ते 17 (समानतेचा हक्क), अनुच्छेद 19, 21 आणि 21 (अ) (स्वातंत्र्याचा हक्क) याबद्दल उपस्थितांना माहिती दिली. त्यांनी सांगितले की, “आमचा उद्देश केवळ पदवी मिळवणे नव्हे, तर संविधानिक मूल्यांवर आधारित न्यायव्यवस्थेमध्ये काम करणे आहे. भविष्यात एमपीएससी परीक्षा देऊन न्यायाधीश होण्याचे आमचे स्वप्न आहे.”
कार्यक्रमाच्या शेवटी अध्यक्ष हाजी ताहेर शेख यांनीही आपल्या मनोगतातून दोन्ही युवकांचे कौतुक केले आणि पुढील वाटचालीस शुभेच्छा दिल्या. आभार प्रदर्शन युसुफ पेंटर यांनी केले. समारोपप्रसंगी सर्व उपस्थितांना चहा व नाश्त्याचे आयोजन करण्यात आले होते.
या कार्यक्रमास अ. गफ्फार खाटीक, हैदर मिस्री, अजिम शेख, मुख्तार मिस्री, कुदरत अली सय्यद, रहीम मलीक, धर्मेश भाऊ, तुषार भोई, राहुल अशोक बैसाने, भूषण कुमार यांच्यासह अनेक मान्यवर मोठ्या संख्येने उपस्थित होते.
हा सत्कार समारंभ केवळ एक औपचारिक कार्यक्रम न राहता युवकांना प्रेरणा देणारा ठरला. समाजातील विद्यार्थ्यांनी यापासून प्रेरणा घेऊन उच्च शिक्षणाच्या दिशेने वाटचाल करावी, हीच या कार्यक्रमामागील मोलाची भावना होती.
