अमळनेर : तालुक्यातील मारवड येथील ग्रामविकास शिक्षण मंडळाची वार्षिक सभा आज दिनांक २५ मे रोजी सकाळी १०.३० वाजता ग्रामविकास मंडळाच्या शैक्षणिक संकुलात आयोजित करण्यात आली आहे. या सभेच्या अध्यक्षस्थानी जनरल बॉडीचे अध्यक्ष मा. जयवंतराव पाटील राहणार आहेत.
सभेत गतवर्षातील कार्याचा आढावा घेण्यात येणार असून, दिवंगत सभासदांना श्रद्धांजली अर्पण करून दुःख व्यक्त करण्यात येणार आहे. तसेच, लेखापरीक्षक धुळे यांनी सादर केलेले मागील तीन वर्षांचे तेरजपत्रक, ताळेबंद व ऑडिट रिपोर्ट सभेसमोर वाचून त्यास मंजुरी दिली जाणार आहे.
यासोबतच मागील सभेचे कार्यवृत्त वाचून त्यास मान्यता देण्यात येईल. सन २०२४-२०२५ या आर्थिक वर्षाचा वार्षिक अहवाल सभेसमोर मांडण्यात येणार असून, त्याची नोंद घेण्यात येणार आहे. कार्यकारी मंडळाने तयार केलेले सन २०२५-२०२६ या वर्षाचे वार्षिक अंदाजपत्रक वाचून त्यास मंजुरी देण्याची कार्यवाही करण्यात येणार आहे.
संस्थेच्या न्यायप्रविष्ट प्रकरणांसाठी वकील नेमणूक व न्यायालयीन खर्च यासंबंधी मंजुरी घेण्यात येणार आहे. तसेच, संस्थेच्या घटना व नियमावलीतील नियम क्रमांक ६(अ) व ६(ब) अन्वये कार्यकारी मंडळाने केलेल्या निर्णयांनाही सभेची मान्यता घेण्यात येणार आहे.
सभेसाठी सर्व सभासदांनी वेळेवर उपस्थित राहावे, असे आवाहन मंडळाचे अध्यक्ष जयवंतराव पाटील, उपाध्यक्ष देविदास पाटील व सचिव देविदास बारकू पाटील यांनी केले आहे.
