नगराध्यक्ष पदासाठी जितेंद्र ठाकूर तसेच सर्व नगरसेवक उमेदवारांना एकदिलाने समर्थन
अमळनेर (अटकाव न्यूज ):—
अमळनेर तालुका व शहर विकास आघाडीच्या पाठीराख्यांच्या यादीत आणखी एक महत्वाचा सामाजिक घटक सामील झाला आहे. येथील मन्सूरी पिंजारी बिरादरीतर्फे लेखी निवेदन देत आघाडीला अधिकृत पाठिंबा जाहीर करण्यात आला. आगामी नगरपरिषद निवडणुकीत शहराच्या सर्वागीण प्रगतीसाठी व स्थिर नेतृत्वासाठी हा पाठिंबा महत्वाचा ठरणार आहे.
समाजाने दिलेल्या लेखी निवेदनात नमूद करण्यात आले की,
“अमळनेर शहरात व्यापक प्रमाणावर विकासकामे व्हावीत, शहरात शांतता, सामंजस्य व एकोपा टिकून राहावा, तसेच अमळनेर हे स्वच्छ, समृद्ध आणि सुरक्षित शहर म्हणून विकसित व्हावे—या हेतूने मन्सूरी पिंजारी समाज तालुका व शहर विकास आघाडीच्या नेतृत्वास पूर्ण सहकार्य करीत आहे.”
समाजाने नगराध्यक्ष पदाचे उमेदवार जितेंद्र ठाकूर तसेच सर्व प्रभागांतील नगरसेवक उमेदवारांना ठाम समर्थन देत आघाडीच्या विजयाचा विश्वास व्यक्त केला आहे. शहराच्या भविष्यकालीन विकासाचा मजबूत पाया घालण्यासाठी आघाडीचे नेते आमदार अनिल पाटील कार्यरत असल्याचा उल्लेखही समर्थन पत्रात करण्यात आला आहे.
या समर्थन पत्राचे आमदार अनिल पाटील व नगराध्यक्ष पदाचे उमेदवार जितेंद्र ठाकूर यांच्या उपस्थितीत औपचारिक सुपूर्दगी करण्यात आली.
यावेळी समाजाचे तालुकाध्यक्ष सलीम महम्मद पिंजारी, मन्वर जुम्मा पिंजारी, अशपाक पिंजारी, इस्माईल पिंजारी, कासम पिंजारी, हाजी इकबाल पिंजारी, वसीम पिंजारी यांच्यासह समाजातील सर्व पदाधिकारी, कार्यकर्ते व मान्यवर मोठ्या संख्येने उपस्थित होते.
या प्रसंगी मन्सूरी पिंजारी समाजाने विविध प्रलंबित मागण्या व विकाससूचना यांचे निवेदनही आमदार अनिल पाटील यांना सुपूर्त केले. या मागण्यांवर सकारात्मक प्रतिसाद देताना आमदार पाटील म्हणाले की,
“निवडणूक आटोपताच या सर्व मागण्यांची कार्यवाही पूर्ण वेगाने करण्यात येईल. समाजाच्या विश्वासाला तडा जाऊ देणार नाही.”
मन्सूरी पिंजारी समाजाच्या या जाहीर समर्थनामुळे अमळनेर तालुका व शहर विकास आघाडीला निवडणूक मोहीमेच्या निर्णायक टप्प्यात मोठी ताकद मिळाल्याचे राजकीय विश्लेषकांकडून व्यक्त केले जात आहे.
