अमळनेर (अटकाव न्यूज हितेंद्र बडगुजर ):–
“अमळनेरातील मुस्लिम समाज बांधवांनी आतापर्यंत अनेक नेते आणि पक्षांना अजमावले, मात्र ठोस परिणाम दिसला नाही. आता राष्ट्रवादी काँग्रेस पक्ष आणि विकासाचे स्पष्ट व्हिजन असलेले आमदार अनिलदादा पाटील यांना एकदा संधी द्या व त्यांच्या पाठीशी भक्कमपणे उभे राहा,” असे आवाहन राष्ट्रवादी काँग्रेस पक्षाच्या राज्यातील अल्पसंख्याक नेत्यांनी अमळनेर येथे झालेल्या भव्य अल्पसंख्याक मेळाव्यात केले.
हा मेळावा शुक्रवार, दि. ७ नोव्हेंबर रोजी छत्रपती शिवाजी महाराज नाट्यगृहात मोठ्या उत्साहात पार पडला. अध्यक्षस्थानी माजी मंत्री तथा आमदार अनिल भाईदास पाटील होते. प्रमुख उपस्थितीत आ. सना मलिक, माजी आ. जिशान बाबा सिद्दीकी, युवा नेते नजीब मुल्ला, आणि राष्ट्रवादी काँग्रेस अल्पसंख्याक विभागाचे प्रदेशाध्यक्ष ऍड. नाझेर काझी होते. तसेच माजी आमदार कृषिभूषण साहेबराव पाटील, जिल्हाध्यक्ष संजय पवार, माजी नगराध्यक्षा सौ. जयश्री अनिल पाटील आदी मान्यवर उपस्थित होते.
या मेळाव्यास शहर व तालुक्यातील मुस्लिम समाज बांधवांनी मोठ्या संख्येने उपस्थित राहून उत्स्फूर्त प्रतिसाद दिला.
“अनिलदादांना एकदा अजमवून पहा” – जिशान सिद्दीकी
आपल्या भाषणात माजी आमदार जिशान सिद्दीकी म्हणाले,
“राज्यात आज असा नेता नाही जो अल्पसंख्याक समाजाच्या हक्कांसाठी ठाम उभा राहील. मात्र अजितदादा पवार हे अपवाद आहेत – अन्याय कुठेही झाला, तरी ते नेहमी पाठिशी राहतात. त्यामुळे आता अमळनेरकरांनीही राष्ट्रवादी आणि आमदार अनिलदादा पाटील यांना एकदा अजमावून पाहावे. येणाऱ्या पालिका निवडणुकीत त्यांना साथ दिल्यास विकासाचे नवे पर्व सुरू होईल,” असे त्यांनी आवाहन केले.
“अमळनेरची मोत्यांची माळ पुन्हा जोडणार” – आमदार अनिल पाटील
सभेत बोलताना आमदार अनिल पाटील म्हणाले,
“अमळनेर हे आमचं छोटं पण सुंदर शहर आहे. येथील प्रत्येक जाती-धर्माचा नागरिक हा मोत्यासारखा आहे. पण काही काळापूर्वी आमच्या मोत्यांच्या माळेला नजर लागली. आता ती माळ पुन्हा जोडून उजळविण्याचे काम मी करणार आहे.”
ते पुढे म्हणाले,
“आमदार म्हणून मी अल्पसंख्याक निधी मोठ्या प्रमाणात आणला आहे. साहेबराव दादांनीही विकासाचा पाया घातला. मात्र ज्यांच्या मागे तुम्ही १४ वर्षं उभे राहिलात, त्यांनी तुम्हाला काय दिलं हे स्वतःला विचारा. मागचं विसरून एकजूट ठेवा — मी कोणत्याही जाती-धर्माला अंतर देणार नाही. सर्वांसाठी मदतीस तत्पर आहे,” असे आश्वासन अनिलदादांनी दिले.
“अजितदादा हे करणारे नेते” – आ. सना मलिक
या वेळी आ. सना मलिक यांनी सांगितले की,
“अजितदादा पवार यांनी कठीण काळात आमच्या कुटुंबाला आणि समाजाला नेहमी हिम्मत दिली आहे. ते फक्त बोलणारे नाहीत, तर काम करणारे नेते आहेत. अनिलदादा हे त्यांचेच क्रियाशील नेतृत्वाचे उदाहरण आहे,” असे त्या म्हणाल्या.
“अमळनेरची भूमी सौहार्दाची आहे” – नजीब मुल्ला
प्रदेशाध्यक्ष नजीब मुल्ला यांनी आपल्या भाषणात सांगितले की,
“अमळनेर येथे संत सखाराम महाराज यांच्या रथास पहिली मोगरी लावण्याचा मान मुस्लिम समाजाला आहे. अशा भूमीत इस्लाम कधीच धोक्यात येऊ शकत नाही. त्यामुळे आता अजितदादा आणि अनिलदादा यांना साथ द्या. अल्पसंख्याक निधी नियमितपणे मिळत आहे, लाडकी बहीण योजना सुरू करणारे अजितदादा आमच्या बहिणींचे खरे ‘हमदर्द’ आहेत. लवकरच अनिलदादा मंत्री होणारच आहेत,” असे त्यांनी सांगितले.
मेळाव्यात नव्या कार्यकर्त्यांचा राष्ट्रवादीत प्रवेश
या मेळाव्यात युवा नेते आरिफ भाया व नावेद शेख यांनीही मनोगत व्यक्त करून मुस्लिम समाजाला अनिलदादांच्या पाठीशी राहण्याचे आवाहन केले.
यावेळी अनेक मुस्लिम कार्यकर्त्यांनी राष्ट्रवादी काँग्रेस पक्षात जाहीर प्रवेश केला.
सूत्रसंचालन इम्रान खाटीक यांनी केले.
मेळावा यशस्वीतेसाठी तालुका अध्यक्ष भागवत पाटील, शहराध्यक्ष मुक्तार खाटीक, अल्पसंख्याक विभागाचे तालुका अध्यक्ष अलीम मुजावर, शहराध्यक्ष कलीमोद्दीन शेख व सर्व पदाधिकारी, कार्यकर्त्यांनी परिश्रम घेतले.
