शेतकऱ्यांना तातडीने मदत द्या – आ. अनिल पाटील यांची मुख्यमंत्री, उपमुख्यमंत्र्यांकडे मागणी; ना. अजित पवारांची घेतली भेट
अमळनेर { अटकाव न्यूज } अवकाळी व सततच्या मुसळधार पावसामुळे अमळनेर विधानसभा मतदारसंघासह संपूर्ण उत्तर महाराष्ट्रातील शेतकऱ्यांचे मोठ्या प्रमाणावर नुकसान झाले असून, बळीराजाच्या हातातोंडाशी आलेला घास हिरावला गेला आहे. या गंभीर परिस्थितीची दखल घेत माजी मंत्री तथा आमदार अनिल भाईदास पाटील यांनी मुंबई येथे मुख्यमंत्री, उपमुख्यमंत्री, कृषिमंत्री तसेच मदत व पुनर्वसन मंत्री यांना तातडीने मदतीसाठी निवेदन दिले.
आ. पाटील यांनी यासंदर्भात उपमुख्यमंत्री ना. अजित पवार आणि कृषिमंत्री दत्तामामा भरणे यांची प्रत्यक्ष भेट घेऊन, तात्काळ पंचनामे करून शेतकऱ्यांना आर्थिक मदत देण्याची मागणी केली.
▪️शेतकऱ्यांचे नुकसान प्रचंड
आ. पाटील यांनी सादर केलेल्या पत्रात नमूद केले आहे की, खरीप हंगामाच्या सुरुवातीला पावसाने मारलेली दडी, त्यानंतर झालेली अतिवृष्टी आणि अखंड कोसळणारा पाऊस यामुळे बळीराजाचा संपूर्ण हंगाम उद्ध्वस्त झाला आहे. सध्या झालेल्या अवकाळी पावसामुळे काढणीला आलेली पिकेसुद्धा पाण्याखाली गेली असून, शेतकऱ्यांचे नुकसान आणखी वाढले आहे.
अमळनेर मतदारसंघातील ८१,२१२ हेक्टर लागवडीखालील क्षेत्रापैकी तब्बल
- ४६,९४८ हेक्टरवरील कपाशी,
- २९,४१२ हेक्टरवरील मका,
- ३,५४४ हेक्टरवरील ज्वारी,
- ७४७ हेक्टरवरील बाजरी,
- आणि २०० हेक्टरवरील सोयाबीन
या पिकांचे मोठ्या प्रमाणावर नुकसान झाले असल्याचे अहवालात नमूद आहे.
▪️कापणी झालेल्या पिकांचाही पंचनामा करा
शासनाच्या विद्यमान निकषांनुसार फक्त उभ्या पिकांचाच पंचनामा केला जातो. मात्र, अवकाळी पावसामुळे कापणी झालेली पिकेसुद्धा शेतात पाण्याखाली गेली आहेत. त्यामुळे अशा पिकांच्याही पंचनाम्याचे आदेश देऊन शेतकऱ्यांना सरसकट आर्थिक मदत मिळावी, अशी ठाम मागणी आमदार पाटील यांनी राज्य सरकारकडे केली आहे.
▪️“बळीराजाच्या आयुष्यातील संकट अधिक गंभीर होऊ नये”
शेतकऱ्यांचे नुकसान पाहता शासनाने तातडीने मदत जाहीर करावी, अन्यथा बळीराजाच्या आयुष्यातील संकट अधिक गंभीर बनेल, असा इशारा व विनंती आमदार पाटील यांनी आपल्या निवेदनात केली आहे.
आ. अनिल पाटील यांच्या या पुढाकारामुळे उत्तर महाराष्ट्रातील शेतकऱ्यांच्या मदतीचा प्रश्न पुन्हा एकदा चर्चेच्या केंद्रस्थानी आला असून, शासनाच्या आगामी निर्णयाकडे संपूर्ण शेतकरीवर्गाचे लक्ष लागले आहे.
