अनेक प्रभागात चुरस; उमेदवारांनी कोअर कमिटीला दिले सर्वाधिकार
अमळनेर अटकाव न्यूज ) : आगामी नगरपरिषद निवडणुकीच्या पार्श्वभूमीवर शहर विकास आघाडीकडून इच्छुक उमेदवारांच्या मुलाखतींची प्रक्रिया शनिवारी (दि. ८ नोव्हेंबर) उत्साहपूर्ण वातावरणात पार पडली. या मुलाखतींना आमदार अनिल भाईदास पाटील, माजी आमदार कृषिभूषण साहेबराव पाटील तसेच कोअर कमिटी सदस्य उपस्थित होते.
शहरातील एकूण १८ प्रभागांमधील ३६ जागांसाठी तब्बल १२९ इच्छुक उमेदवारांनी मुलाखती दिल्या. अनेक प्रभागांमध्ये इच्छुकांची संख्या जास्त असल्याने चुरसपूर्ण वातावरण निर्माण झाले होते. तथापि, सर्व उमेदवारांनी एकमताने कोअर कमिटीच्या निर्णयाला मान्यता देण्याचे व आघाडीच्या उमेदवाराला एकदिलाने पाठबळ देण्याचे आश्वासन दिले.
सकाळी १० वाजता सुरू झालेली ही प्रक्रिया सायंकाळपर्यंत चालली. मुलाखती खेळीमेळीच्या आणि बांधिलकीच्या वातावरणात पार पडल्या. यावेळी अनेक माजी नगरसेवकांसह नवउमेदवारांनीही आघाडीकडून उमेदवारी मिळावी अशी इच्छा व्यक्त केली.
दरम्यान, लोकनियुक्त नगराध्यक्ष पदासाठी इच्छुक उमेदवारांच्या मुलाखती आज (दि. ९ नोव्हेंबर) सकाळी १०.३० वाजता आमदार अनिल पाटील यांच्या चोपडा रस्त्यावरील क्रशर मशीनवर होणार असल्याची माहिती कोअर कमिटीने दिली आहे.
