महाराष्ट्रातील पहिले लाभार्थी ठरले अमळनेरचे ज्येष्ठ पत्रकार
अमळनेर (अटकाव न्यूज ) :—
पत्रकारिता क्षेत्रातील अविरत सेवेला मानाचा मुजरा मिळाला आहे! अमळनेर तालुक्यातील ज्येष्ठ व शासनमान्य पत्रकार श्री. सुभाष पाटील घोडगांवकर यांनी कै. शंकरराव चव्हाण सुवर्ण महोत्सवी पत्रकार कल्याण निधी योजनेचे महाराष्ट्रातील पहिले लाभार्थी ठरण्याचा मान मिळवला आहे. शासनाने त्यांच्या कार्याची दखल घेत त्यांना कायमस्वरूपी अपंगत्वामुळे एक लाख रुपयांचे अर्थसहाय्य मंजूर केले असून, हा निधी दि. 24 रोजी थेट त्यांच्या बँक खात्यात जमा करण्यात आला आहे.
पत्रकार कल्याण निधी योजना ही महाराष्ट्र शासनाची दूरदृष्टी दाखवणारी उपक्रमशील योजना असून, ती 1 ऑगस्ट 2009 रोजीच्या शासन निर्णयानुसार सुरु करण्यात आली आहे. या योजनेअंतर्गत शासनमान्य पत्रकारांना अपघात, कायम अपंगत्व, दुर्धर आजार किंवा आकस्मिक मृत्यूच्या प्रसंगी आर्थिक मदत दिली जाते.
श्री. पाटील यांनी आठ महिन्यांपूर्वी जिल्हा माहिती अधिकारी कार्यालयात अर्ज दाखल केला होता. त्यांच्या प्रामाणिक पत्रकारितेचा आणि सेवाभावाचा विचार करून शासनाने हा अर्ज मंजूर केला. पत्रकार पेन्शन योजनेचेही ते अमळनेर तालुक्यातील एकमेव लाभार्थी ठरले आहेत.
या निर्णयामुळे स्थानिक पत्रकार संघटनांमध्ये आनंदाचे वातावरण निर्माण झाले असून, ज्येष्ठ पत्रकारांच्या सन्मानार्थ ही योजना प्रत्यक्षात कार्यान्वित झाल्याने पत्रकार बांधवांमध्ये समाधानाची भावना व्यक्त होत आहे.
???? पत्रकार सुभाष पाटील घोडगांवकर यांचे अभिनंदन करताना स्थानिक पत्रकार बांधवांनी म्हटले — “हा सन्मान केवळ एका पत्रकाराचा नाही, तर संपूर्ण शहरी व ग्रामीण पत्रकारितेच्या निष्ठेचा गौरव आहे.”
???? कै. शंकरराव चव्हाण पत्रकार कल्याण निधी योजना — ज्येष्ठ पत्रकारांसाठीचा एक खरा आशेचा किरण! ????
