सिल्लोड, (प्रतिनिधी) – अल्लामा फ़ज़ले हक़ खैराबादी (रह.) स्टडी सेंटर आणि पब्लिक लाइब्रेरी येथे आदिवासी क्रांतीदल या समाजिक संघटनेच्या तालुकाध्यक्षपदी आप्पा दाभाडे साहेब यांची नुकतीच नियुक्ती करण्यात आली. या नियुक्तीच्या निमित्ताने आप्पा दाभाडे आणि त्यांच्या संपूर्ण टीमचा सन्मान व सत्कार समारंभ मोठ्या उत्साहात पार पडला.
कार्यक्रमाची सुरुवात अध्यक्ष रियाज़ शेख यांच्या प्रस्ताविकेने झाली. यावेळी त्यांनी डॉ. बाबासाहेब आंबेडकर यांचे शिक्षणाविषयीचे विचार मांडले. “शिक्षण हे वाघीनीचे दूध आहे”, हे बाबासाहेबांचे विचार पुढे नेत त्यांनी समाजात शिक्षणाचे महत्व पटवून दिले. त्यांनी युवकांना व्यसनमुक्त जीवन जगण्याचा, पालकांचा आदर करण्याचा, आणि समाजात स्वच्छतेचे वातावरण निर्माण करण्याचा संदेश दिला. “एक रोटी कम खाओ, अपने बच्चों को पढ़ाओ”, असा प्रेरणादायी संदेश त्यांनी दिला.
त्यानंतर सत्कारमूर्ती आप्पा दाभाडे यांनी आपले मनोगत व्यक्त करताना सांगितले की, “माणसासाठी कोणतीही गोष्ट अशक्य नाही, जर त्याने प्रयत्न केले तर.” त्यांनी बाबासाहेब आंबेडकर यांचे विचार उद्धृत करत सांगितले की, “जर तुमच्याकडे दोन रुपये असतील, तर एक रुपयाची भाकरी घ्या आणि एक रुपयाचं पुस्तक घ्या.” वाचनाचे महत्त्व अधोरेखित करत त्यांनी उपस्थित तरुणांना अध्ययन आणि संघर्ष यांचा संगम साधण्याचे आवाहन केले.
या कार्यक्रमात समाजिक कार्यकर्ता भरत बोरसे यांनी सध्याच्या तंत्रज्ञान युगाबद्दल आपले विचार मांडले. त्यांनी बदलत्या काळानुसार आपले विचार, कौशल्ये व जीवनशैली बदलण्याची गरज अधोरेखित केली. “रुपयाचा स्वरूप जसं बदललं, तसं आपणही बदल स्वीकारायला हवे”, असे सांगत त्यांनी उदाहरणांच्या माध्यमातून आपला मुद्दा स्पष्ट केला.
कार्यक्रमाच्या अध्यक्षस्थानी जहूर मुतवल्ली होते. आभार प्रदर्शन राजु शेख हाजी अलाउद्दीन मिस्री यांनी केले.
या प्रसंगी गोरख महाराज, पत्रकार प्रविण बैसाने, संतोष संदानशिव, प्रभाकर पवार, बाळु जमादार, रवि भाऊ भिल, प्रकाश भाऊ भिल, युसूफ पेंटर, अमजदअली शाह, मुक्तार मिस्री, शाहरुख सिंगर, फारुख खाटीक, आकिब अली यांच्यासह अनेक मान्यवर उपस्थित होते.
या प्रेरणादायी कार्यक्रमामुळे सामाजिक सलोखा, शिक्षणाची जाणीव आणि नवयुवकांमध्ये नेतृत्वगुणांची भावना अधिक बळकट झाली असल्याचे मत उपस्थितांनी व्यक्त केले.
