अमळनेर (अटकाव न्यूज):
अमळनेर शहरातील महिला, विद्यार्थी, युवा आणि जेष्ठ नागरिकांच्या सर्वांगीण विकासाला चालना देणारी अनेक महत्वाकांक्षी कामे सध्या वेगाने सुरू आहेत. अमळनेर तालुका व शहर विकास आघाडीच्या माध्यमातून माजी मंत्री तथा आमदार अनिल पाटील, खासदार स्मिता वाघ, माजी आमदार कृषिभूषण साहेबराव पाटील, माजी नगराध्यक्षा जयश्री पाटील यांच्या नेतृत्वाखाली ही विकासकामे आकार घेत आहेत.
शहरात उभे राहत असलेले भव्य क्रीडा संकुल, राष्ट्रीय पातळीवर प्रसिद्ध असलेल्या मंगळग्रह मंदिराचा सुरू असलेला कायापालट, झामी चौकातील नवीन जलकुंभ, छत्रपती शिवाजी महाराज उद्यानाचे सुशोभीकरण, अभ्यासिकांची उभारणी, पैलाड भागातील स्मशानभूमीचे नूतनीकरण यांसह अनेक प्रकल्पांमुळे शहराचा चेहरा बदलत आहे.
क्रीडा संकुल : तरुणाईच्या प्रगतीला मिळाली नवी धाव
मारवड रोड परिसरात तब्बल १० कोटींच्या निधीतून उभा राहत असलेला भव्य क्रीडा संकुल तरुणाईसाठी मोठे आकर्षण ठरत आहे. पोलिस भरती, लष्करी भरती, अग्निशमन दल व विविध स्पर्धा परीक्षांच्या मैदानी चाचण्या लक्षात घेऊन हजारो तरुण येथे नियमित सराव करत आहेत.
क्रीडा संकुलात उपलब्ध सुविधा –
- बॅडमिंटन कोर्ट
- माती व गादीवरील कुस्ती शेड
- जॉगिंग ट्रॅक
- टेबल टेनिस
- ओपन जिम
- मैदान व प्रशिक्षण सुविधांचा उत्तम समन्वय
बंगाली फाईल, तांबेपुरा, पिंपळे रोड, गलवाडे रोड, मारवड रोड, ढेकू रोड यांसह शहराच्या विविध भागातील तरुण या सुविधांचा लाभ घेत आहेत. जिल्हा क्रीडा संकुलाच्या धर्तीवर ही सुविधा उभारली जात असल्याने तालुक्याच्या क्रीडाक्षेत्राला नवी दिशा मिळत आहे.
मंगळग्रह मंदिराचा कायापालट : पर्यटकांसाठी नवा आकर्षणबिंदू
देशभरात प्रसिद्ध असलेल्या मंगळग्रह मंदिराच्या परिसरासाठी २५ कोटींचा निधी आमदार अनिल पाटील यांच्या माध्यमातून मंजूर झाला आहे. या निधीतून मंदिर परिसराचे सौंदर्यीकरण, पायाभूत सुविधा सुधारणा आणि पर्यटकांसाठी आवश्यक व्यवस्था तयार होत आहेत. यामुळे अमळनेरचे पर्यटन क्षेत्र नव्या उंचीवर जाण्याची अपेक्षा व्यक्त करण्यात येत आहे.
झामी चौकातील नवीन जलकुंभ : पाण्याच्या समस्येला कायमस्वरूपी तोडगा
झामी चौकातील जुना व जीर्ण जलकुंभ पाडून ३ कोटींच्या खर्चातून आधुनिक जलकुंभ उभारणीचे काम सुरू आहे. या प्रकल्पामुळे माळीवाडा, कसाली मोहल्ला, अमलेश्वर नगर व आसपासच्या परिसरातील नागरिकांच्या पाण्याच्या तक्रारी पूर्णपणे निवळण्याची शक्यता आहे.
स्मशानभूमीचे नूतनीकरण : पर्यावरणपूरक व्यवस्था
पैलाड भागातील मुख्य स्मशानभूमी जीर्णावस्थेत असल्याने १ कोटी रुपयांत तिचे नूतनीकरण सुरू आहे. नव्या बांधकामासोबतच पर्यावरण संरक्षणाच्या दृष्टीने विद्युत दाहिनी देखील उभारली जात आहे. अंत्यसंस्कार व्यवस्थेची गुणवत्ता आणि स्वच्छता यात मोठी सुधारणा होणार आहे.
अभ्यासिका व ग्रंथालये : विद्यार्थ्यांसाठी आधुनिक सुविधा
स्पर्धा परीक्षांची तयारी करणाऱ्या विद्यार्थ्यांसाठी विविध प्रभागांत २ कोटी रुपयांच्या निधीतून आधुनिक अभ्यासिका आणि ग्रंथालयांची उभारणी सुरू झाली आहे. काही प्रभागांमध्ये कामे अंतिम टप्प्यात असून विद्यार्थ्यांना शांत, सुरक्षित आणि संसाधनयुक्त अभ्यासाचे वातावरण मिळणार आहे.
विकासाची गती दुपटीने वाढवण्यासाठी आवाहन
शहरातील ही सर्व विकासकामे अधिक वेगाने पूर्ण व्हावीत आणि अमळनेरचा विकास दुपटीने वाढावा यासाठी अमळनेर तालुका शहर विकास आघाडीने नगराध्यक्ष पदाचे उमेदवार जितेंद्र ठाकूर तसेच १८ प्रभागांतील ३५ उमेदवारांच्या नावासमोरील शिट्टी चिन्हावर मतदान करण्याचे आवाहन केले आहे.
