अमळनेर,:“वडिलांचे स्वप्न पूर्ण करणे हेच माझे कर्तव्य होते,” असे म्हणणारे एस.टी. कर्मचारी विजय भटू वाडेकर यांनी एलएलबीची पदवी संपादन करून आपल्या दिवंगत वडिलांच्या इच्छेला खरी श्रद्धांजली वाहिली आहे. त्याच्या या यशाचे सर्वत्र कौतुक होत असून आमदार अनिल पाटील यांच्यासह रा.प.महामंडळातील सहकाऱ्यांनी त्यांचा सत्कार करून सन्मान केला.
विजय वाडेकर हे मूळचे अमळनेर तालुक्यातील निंभोरा येथील रहिवासी असून सध्या ते एस.टी. महामंडळाच्या अमळनेर आगारात लिपिक म्हणून कार्यरत आहेत. अत्यंत सामान्य कुटुंबात जन्म घेतलेल्या विजय यांनी एम.ए., बी.एड. पर्यंतचे शिक्षण पूर्ण केल्यानंतर सुरुवातीच्या काळात दोन वर्षे वाहक म्हणून कार्य केले. त्यानंतर सेवांतर्गत परीक्षा देऊन त्यांना लिपिक पदावर बढती मिळाली.
वाडेकर यांचे वडील हे मुलगा वकील व्हावा अशी मनोमन इच्छा बाळगून होते. मात्र घरच्या आर्थिक गरजांमुळे विजय यांना नोकरी पत्करावी लागली आणि वडिलांचे स्वप्न अपूर्णच राहिले. वडिलांच्या निधनानंतर त्यांनी त्यांचे अपूर्ण स्वप्न पूर्ण करण्याचा निश्चय केला. नोकरी सांभाळत एलएलबी अभ्यासक्रमाला प्रवेश घेत त्यांनी कठोर परिश्रमातून विधी पदवी संपादन केली.
या यशाबद्दल आमदार व माजी मंत्री अनिल पाटील, आगार व्यवस्थापक, एस.टी. कर्मचारी आणि निंभोरा ग्रामस्थ यांनी त्यांचा सत्कार केला. विजय वाडेकर यांचा हा प्रवास नव्या पिढीसाठी प्रेरणादायी असून स्वप्न, जिद्द आणि चिकाटी यांच्या जोरावर कोणतीही गोष्ट अशक्य नसल्याचे त्यांनी दाखवून दिले आहे.
