अमळनेर, ता. ११ एप्रिल:
जळोद रस्त्यावर सिद्धिविनायक मंगल कार्यालयाजवळ वळणावर गुरुवारी (ता. ११ एप्रिल) रात्री ९ वाजेच्या सुमारास एस.टी. बस व ट्रक यांच्यात समोरासमोर धडक होऊन मोठा अपघात झाला. या धडकेत एस.टी. चालक, वाहक व दोन ते तीन प्रवासी मिळून चार ते पाच जण जखमी झाले आहेत. अपघातामुळे काही वेळ मार्गावरील वाहतूक ठप्प झाली होती.
प्राथमिक माहितीनुसार, एस.टी. बस नेहमीप्रमाणे जळोद रस्त्यावर अमळनेरहून पिंपळी येथे जात होती. दरम्यान, विरुद्ध दिशेने भरधाव वेगात येणाऱ्या ट्रकने वळणावर नियंत्रण गमावून थेट बसला जोरदार धडक दिली. या भीषण धडकेत एस.टी. बसचा समोरील भाग मोठ्या प्रमाणात नुकसान झाल्याने चालक व वाहक यांना गंभीर दुखापत झाली. त्याचप्रमाणे काही प्रवाशांनाही किरकोळ ते गंभीर स्वरूपाच्या जखमा झाल्या आहेत.
धडकेनंतर ट्रक रोडच्या बाजूला पलटी झाला, त्यामुळे ट्रकचालक त्यात अडकून पडला होता. अपघातस्थळी नागरिकांनी मोठ्या संख्येने गर्दी केली होती. लोकांनी प्रसंगावधान राखून ट्रकच्या आत अडकलेल्या चालकाला बाहेर काढले. त्यानंतर पोलिसांनी त्वरीत घटनास्थळी धाव घेतली. हेडकॉन्स्टेबल विनोद भोई यांच्या नेतृत्वाखाली पोलीस पथकाने सर्व जखमींना तातडीने उपचारासाठी जवळच्या रुग्णालयात दाखल केले.
दरम्यान, अपघातामुळे मार्गावर वाहतूक ठप्प झाली होती. पोलिसांनी तत्काळ मार्गावरील अडथळा दूर करून वाहतूक सुरळीत केली. अपघाताचे नेमके कारण स्पष्ट झाले नसले तरी ट्रक चालकाचा वेग व वळणावर नियंत्रण न राखणे हे मुख्य कारण असल्याचा प्राथमिक अंदाज वर्तवण्यात येत आहे.
याप्रकरणी पुढील तपास अमळनेर पोलीस स्टेशनमार्फत सुरू आहे.
