शेतकऱ्यांच्या विविध मागण्यांसाठी राष्ट्रवादी काँग्रेस शरद पवार गटाचे प्रांताधिकाऱ्यांना निवेदन
अमळनेर – निवडणुकीत महायुतीच्या माध्यमातून शेतकऱ्यांना सरसकट कर्जमुक्तीचे आश्वासन देण्यात आले होते, मात्र अद्याप त्याच्या पूर्ततेसाठी कोणतेही ठोस पाऊल उचललेले नाही. तसेच यावर्षी कापसाला अपेक्षित हमीभाव मिळाला नसल्याने शेतकऱ्यांना प्रतिक्विंटल ५०००/- रुपये अनुदान देण्यात यावे, अशी मागणी राष्ट्रवादी काँग्रेस शरद पवार गटाच्या वतीने करण्यात आली आहे.
अमळनेर तालुक्यातील अनेक शेतकऱ्यांचा कापूस अजूनही घरी पडून आहे. त्यामुळे अमळनेर येथे कॉटन कॉर्पोरेशन ऑफ इंडिया (C.C.I.) सुरू करण्यात यावे, अशीही मागणी करण्यात आली. याशिवाय मका, गहू, हरभरा व भरडधान्याच्या सरकारी खरेदी केंद्रांचे तात्काळ सुरू करण्याची आवश्यकता आहे.
यावर्षी झालेल्या अतिवृष्टीच्या पंचनाम्यात ग्रामीण भागातील काही शेतकऱ्यांची नावे राहून गेल्याने, संबंधित ग्रामसेवकांना आदेश देऊन ही नावे तातडीने समाविष्ट करावी, अशी मागणीही करण्यात आली.
या मागण्यांसाठी राष्ट्रवादी काँग्रेस शरद पवार गटाच्या पदाधिकाऱ्यांनी अमळनेर प्रांताधिकाऱ्यांना निवेदन दिले. यावेळी राष्ट्रवादी काँग्रेसचे जिल्हाध्यक्ष प्रमोद पाटील, पक्ष निरीक्षक भास्करराव काळे, ओबीसी अध्यक्ष अशोक पाटील यांची प्रमुख उपस्थिती होती. त्यांच्यासह जेष्ठ नेत्या तिलोत्तमा पाटील, तालुकाध्यक्ष सचिन पाटील, शेतकरी संघाचे माजी अध्यक्ष संजय पुनाजी पाटील, कविता पवार, भारती पाटील, अनंत निकम, युवक अध्यक्ष परेश शिंदे, सुनिल अहिरराव, अक्षय पाटील, वासुदेव पवार, ईश्वर पाटील, कल्पेश गुजर, विनोद बोरसे यांच्यासह असंख्य पदाधिकारी आणि कार्यकर्ते उपस्थित होते.
