फराळातून आनंदाची गोडी, सायकलींतून शिक्षणाला गती; पाटील दाम्पत्याचा सामाजिक उपक्रम
अमळनेर : दिवाळी म्हणजे आनंद, उत्साह आणि आपुलकीचा सण! मात्र, हा आनंद केवळ स्वतःपुरता मर्यादित न ठेवता समाजातील गरजू घटकांसोबत वाटण्यातच खरा दिवाळीचा आनंद असतो, याचा प्रत्यय अमळनेर येथे आला. दिवाळी पाडव्याचे औचित्य साधत माजी नगरसेवक विक्रांत पाटील व नगरसेविका सौ. स्वप्ना पाटील यांनी आयोजित केलेल्या स्नेहमिलन कार्यक्रमात सामाजिक बांधिलकी जपत स्तुत्य उपक्रम राबविण्यात आला. यावेळी सफाई कामगार व गरजू कुटुंबांना दिवाळी फराळाचे वाटप करण्यात आले, तर गरीब व होतकरू शालेय विद्यार्थिनींना सायकली भेट देऊन त्यांच्या शिक्षणाच्या प्रवासाला नवी दिशा देण्याचा प्रयत्न करण्यात आला.
कार्यक्रमाच्या प्रारंभी उपस्थित मान्यवरांच्या हस्ते गरीब व होतकरू विद्यार्थिनींना सायकली प्रदान करण्यात आल्या. सायकल मिळाल्यानंतर विद्यार्थिनींच्या चेहऱ्यावर आनंद आणि समाधान ओसंडून वाहत होते. शाळा घरापासून दूर असल्यामुळे शिक्षणासाठी येणाऱ्या अडचणी आता कमी होतील, असा विश्वास या विद्यार्थिनींनी व्यक्त केला. सायकलच्या माध्यमातून त्यांचा शाळेपर्यंतचा प्रवास अधिक सुलभ होणार असून शिक्षण सुरू ठेवण्यासाठीही मोठी मदत मिळणार आहे.
यानंतर परिसरातील सफाई कामगार आणि गरजू कुटुंबांना दिवाळी फराळाच्या पाकिटांचे वाटप करण्यात आले. समाजाच्या स्वच्छतेसाठी अहोरात्र मेहनत घेणाऱ्या सफाई कामगारांच्या चेहऱ्यावरही दिवाळीचा आनंद फुलविण्याचा हा उपक्रम विशेष ठरला. सणासुदीच्या काळात समाजातील प्रत्येक घटकाला आनंदात सहभागी करून घेण्याचा संदेश या उपक्रमातून देण्यात आला.
याप्रसंगी नाभिक समाजाचे नेते श्री. मधुकरराव सैदाणे यांनी आपले मनोगत व्यक्त करताना सांगितले की, दिवाळीचा आनंद हा केवळ आपल्यापुरता मर्यादित नसून तो समाजातील प्रत्येक घटकासोबत वाटण्यातच खरा आनंद आहे. गरजू कुटुंबांना मदतीचा हात देणे आणि गरीब विद्यार्थिनींच्या शिक्षणासाठी सायकली उपलब्ध करून देणे, हा समाजाप्रती असलेल्या बांधिलकीचा उत्तम परिचय आहे.
या स्नेहमिलन कार्यक्रमाला माजी उपनगराध्यक्ष डॉ. रामभाऊ शेलकर, माजी नगरसेवक राजाराम बडगुजर, हिंम्मतराव देसले, राष्ट्रीय पुरस्कारप्राप्त आदर्श शिक्षक श्री. राधेबाबा चौधरी, कोळी समाजाचे तालुकाध्यक्ष मधुकरराव सोनवणे, ज्येष्ठ नागरिक सोमा ठाकूर, सामाजिक कार्यकर्ते दीपक पाटील, नितीन पाटकरी, कैलास महाजन, मुकादम तन्वीर शेख यांच्यासह परिसरातील ज्येष्ठ नागरिक, महिला, युवक आणि कार्यकर्ते मोठ्या संख्येने उपस्थित होते.
कार्यक्रमाच्या शेवटी नगरसेविका सौ. स्वप्ना पाटील यांनी उपस्थित सर्व मान्यवरांचे व सहकार्य करणाऱ्यांचे आभार मानले.
या उपक्रमाच्या यशस्वितेसाठी प्रविण ठाकूर, अशोक पाटील, राहुल महाजन, हितेश बारी, जयेश बडगुजर, रामकृष्ण कोळी, नीरज पाटकरी, स्वामी सैदाणे, अनिल पवार आदींनी विशेष सहकार्य केले.
दिवाळीच्या सणात गरजूंच्या चेहऱ्यावर हास्य फुलविण्यासोबतच मुलींच्या शिक्षणाला प्रोत्साहन देणारा हा उपक्रम सामाजिक बांधिलकीचा संदेश देणारा ठरला.
