अमळनेर | अटकाव न्यूज:-
“जिद्द, मेहनत आणि चिकाटी असेल, तर कोणतीही परिस्थिती यशाच्या आड येऊ शकत नाही,” हे अमळनेरच्या एका होतकरू मल्लाने पुन्हा एकदा सिद्ध करून दाखवले आहे. शहरातील अनमोल सुपर शॉपसमोर छोटेसे चहाचे दुकान चालवून कुटुंबाचा उदरनिर्वाह करणारे वसंत (बापू) चौधरी यांचा मुलगा चि. योगीराज वसंत चौधरी याची पुणे येथील बालेवाडी स्टेडियमवर होणाऱ्या प्रतिष्ठेच्या ‘महाराष्ट्र केसरी २०२६’ कुस्ती स्पर्धेसाठी ६५ किलो वजनी गटात निवड झाली आहे.
ही निवड अमळनेर शहरासाठी अभिमानास्पद असून, योगीराजच्या यशाने संपूर्ण परिसरात आनंदाचे वातावरण निर्माण झाले आहे.
गरिबीवर मात करत गाठले यशाचे शिखर
योगीराजचे वडील वसंत (बापू) चौधरी हे अत्यंत कष्टकरी असून, चहाचे छोटे दुकान चालवून आपल्या कुटुंबाची जबाबदारी समर्थपणे सांभाळतात. आर्थिक परिस्थिती अत्यंत हलाखीची असतानाही, योगीराजने आपल्या स्वप्नांशी कधीही तडजोड केली नाही.
दिवसातील अनेक तास लाल मातीमध्ये घाम गाळत, कठोर सराव करत आणि अनेक अडचणींवर मात करत त्याने हे यश मिळवले आहे. अपुऱ्या साधनसामग्रीतही कुस्तीप्रती असलेली त्याची निष्ठा आणि मेहनत आज फळाला आली आहे.
बालेवाडीच्या मैदानात अमळनेरचे प्रतिनिधित्व
पुण्यातील छत्रपती शिवाजी महाराज क्रीडा संकुल, बालेवाडी येथे होणाऱ्या राज्यातील सर्वात मानाच्या कुस्ती स्पर्धेत योगीराज आता अमळनेरचे प्रतिनिधित्व करणार आहे.
६५ किलो वजनी गटात त्याची निवड झाल्याने कुटुंबीय, मित्रपरिवार, कुस्तीप्रेमी आणि नागरिकांकडून त्याच्यावर अभिनंदनाचा वर्षाव होत आहे.
अमळनेरचा अभिमान, तरुणांसाठी प्रेरणा
योगीराजच्या या यशामुळे केवळ चौधरी कुटुंबाचीच नव्हे, तर संपूर्ण अमळनेर शहराची मान उंचावली आहे. एका सामान्य, कष्टकरी कुटुंबातील मुलाने राज्यस्तरीय सर्वात मोठ्या कुस्ती स्पर्धेत स्थान मिळवणे, हे शहरातील अनेक होतकरू खेळाडूंना प्रेरणादायी ठरणारे आहे.
यावेळी योगीराजचे वडील वसंत (बापू) चौधरी यांनी भावना व्यक्त करताना सांगितले की,
“माझ्या मुलाने पाहिलेले स्वप्न आणि त्यासाठी घेतलेले अपार कष्ट आज फळाला आले आहेत. आम्हाला त्याचा मनापासून अभिमान आहे.”
पुढील वाटचालीसाठी शुभेच्छांचा वर्षाव
‘महाराष्ट्र केसरी २०२६’ च्या मैदानात अमळनेरचे नाव उज्ज्वल करण्यासाठी सज्ज झालेल्या योगीराज चौधरीला सर्व स्तरातून शुभेच्छा दिल्या जात असून, त्याच्या यशस्वी वाटचालीसाठी संपूर्ण शहर त्याच्या पाठीशी उभे आहे.
योगीराजला महाराष्ट्र केसरीच्या मैदानात घवघवीत यश मिळो, यासाठी मनःपूर्वक शुभेच्छा!..
